Recercatores statounitese ha trovate forte evidentia que simias primate se communica con gestos.

Analysante le modo in que duo species de primates produce gestos con lor manos, bracios e gambas, le scientistas determinava que lor gesticulation es plus flexibile que lor expressiones facial e vocal.

Le capacitate de apprender gestos distingue le primates de altere simias e del major parte del species animal in existentia, dice Frans de Waal, membro del equipa de recercatores.

Le trovatas supporta le theoria que le linguage human se disveloppava per le uso de gestos manual.

Le Commission Europee ha decidite a establir un Gruppo a nivello alte super le Multilinguismo. Le prime incontro formal del gruppo habera loco le 3 de octobre 2006.

"Io ha petite al Gruppo de considerar un varietate de themas que cade foras del mandato habitual del gruppos governamental de expertos super le linguas", diceva le commissionero Ján Figel, lanceante le gruppo. "Iste themas include le ligamines inter linguas e recerca, linguas e le medios de communication, linguas pro commercio, le uso de nove technologias pro le traduction e interpretation e strategias pro promover le apprendimento de linguas."

Le morite telephonava durante su interramento

Beograd (mti) - Processo menacia un interprenditor de interramentos in Serbia...

...malgrado que le homine in question organisava toto accuratemente, ille mesmo appellava le relatives in America a casa; dicente, que le capite de lor familia, oncle Bogoljub Topalović, 84 annos decedeva in le hospital. Ma postea in le momento final, durante le placiamento del sarcophago in le fossa le morite telephonava a su filia, criticante que nemo le visita in le hospital ja desde plure dies.

Un parte del lugentes rideva, le altere plorava - a causa del furor. Le examine verificava: un infirmera in le hospital era culpabile; quando un altere homine malade decedeva, illa confundeva le nomines, proque illa se hastava tanto pro informar le interprenditor de interramentos, a fin que illa recipe de ille le percentage usual.

Le balenas parla "in differente linguas"; assi le mammales maritime del Pacifico a pena comprende lor co-racianos vivente in le Oceano Atlantic; e le balenas habitante al costas de Chile pote difficilemente arrivar a "denominator commun" con le balenas vivente presso le Polo Sud.

David Mellinger, explorator del universitate in le stato Oregon del SUA studiava le tonos producite per le balenas del Pacifico e illos del gigantesc balenas con ambergris. Le "spionar" deveniva possibile per le systema registrante seismos installate sub le aqua, que registrava tamben le conversation del mammales maritime - se lege sur le portal russe de novas "Lenta".

Como il se verificava, le "parlar" del mammales maritime consiste de ruitos, sibilos e tonos susurrante de alte frequentia, ma le specimenes del population nordic e del sud "misce" le tonos in differente proportiones e tamben le frequentia del "parlar" pote ser differente.

Le mammales maritime usa un parte del tonos pro orientation, ma le altere partes pro communication. Le explorator registrava le plus complicate "melodias" durante le epocha del copulation.

(agentia de novas MTI, rubrica Panoráma)

Hamburg (mti) – Le policieros ha capturate un effractor causante seriose damnos in un appartamento. In le unitate local del policia le alarmator del appartamento signava, que occurreva un entrata inautorisate. Le patrulia videva, que le texturas de plure mobiles e le cortinas obscurante del fenestras esseva rumpite in partes per un delinquente incognoscite, de plus esseva rumpite un aquario, cuje pisces jaceva sin ordine in le appartamento. Finalmente on trovava le delinquente sub le pulpito del cocina: illo esseva un catto robuste.

Sydney (mti) – Le sanguine de crocodilo occide le virus VIH – a iste conclusion veniva le recercatores del Parca Darwin de Crocodilos al parte tropic de Australia Nordic explorante le sanguine del reptile. Per iste discoperta pote devenir possibile le disveloppamento de un nove antibiotico. Le systema immun del crocodilo es multo plus forte que illo del homine e illo es multo plus resistente contra le infectiones periculose, contra le vulneres grave. On faceva le prime explorationes del systema immun per crocodilo in 1998 e se verificava que le anticorpore in le corpore del reptile occide le bacterios – annunciava Adam Britton, scientista australian, qui ha narrate que si on adde sero de crocodilo a sanguine infectate per VIH illo face un multo plus grande effecto que le sero human; illo quasi devora le majoritate del viruses VIH.

In Brasil le policia ha devastate per inadvertentia un plen village per bulldozers. Le septanta policieros debeva destruer un altere village a distantia de octo kilometros secundo un ordine judicial, proque le colonia esseva construite illegalmente.

Un successo in le lucta contra le paupertate require minus moneta que le paises ric ha promittite plure vices, ma plus que illos de facto da. Isto dice un reporto-concepto del Projecto Millennio, un consilio independente instituite per le Nationes Unite.

Secundo le reporto, Investing in Development: A practical plan to achieve the millennium development goals, que essera offerite al secretario-general Kofi Annan a lunedi, essera requirite durante le veniente dece annos 121 milliardos de dollares in 2006 a 189 millioardos de dollares in 2015. Isto es maximalmente 0,54 pro cento del producto national brute del paises ric. Le paises ha promittite de dar 0,7 pro cento, ma de facto non da plus que 0,25.

Le reporto es le plano de action le plus ambitiose e plus detaliate jammais presentate. Secundo le NU, le population mundial presente es "le prime generation capabile de finir le paupertate extreme in le mundo".

Un million de dollares -- ecce le costo de un zona libere de minas terrestre pro elephantes african. Le organisation american Roots of Peace tenta colliger le summa in un initiativa que ha le supporto del Nationes Unite.

Le minas, le resultato de decennios de guerra civil, impedi a quasi 120.000 elephantes in Botswana del Nord de utilisar lor itinere normal de migration verso Angola e Zambia. Post haber perdite multe cogregarios al minas, le animales ha cessate de migrar, causante molestia e damno al agricultura regional. Sin mesuras, 60.000 membros del specie impericulate curre le risco de esser occidite.

Secundo le NU, il ha al minus 2.200 locos con minas o munition non explodite in le area de 10 x 150 kilometros. Le initiativa del organisation pacifista es parte de un plano plus grande pro un parco de natura dividite inter plure paises in le region.

Le ministros de Defensa del Union Europee ha durante un incontro in Noordwijk (Nederlandia) signate un declaration politic pro formar inter 8 e 10 unitates de combatto, que ab 2007 va appoiar le politica europee de securitate.

Le unitates a mobilisation rapide debe devenir un del instrumentos le plus importante del politica europee de defensa, e debe poter ager in omne situationes de violentia, incluse le guerra.

In ultra ha essite instituite un special fortia policiari europee. Le ‘gendarmeria europee’ essera empleate in le reconstruction de paises affligite per le guerra. Le participantes es Nederlandia, Francia, Italia e Portugal.

Il ha plure theorias re le ancian location geographic del absorbite continente Atlantida, ma nunc se ha annunciate un geographo svedese con un nove: ille opina que Atlantida esseva de facto le presente Irlanda.

Ulf Erlingsson basa su assertion super le descriptiones detaliate de Platon – philosopho ancian grec – del anno 360 ante Christo. Platon scribe que Atlantida ha un grande plana in su medie circumferite con montes, e secundo Erlingsson, del 50 plus grande insulas del mundo solmente Irlanda conveni a iste descriptiones.

De plus, le insula describite per Platon es justo 480 kilometros longe e 320 kilometros large, como Irlanda, e es plus large in le medie que a su duo bordos. Assi describe Erlingsson in su nove libro titulate Atlantis from a Geographer's Perspective: Mapping the Fairy Land.

Actualisation: Le Museo National de Irlanda ha disputate le theoria, dicente que existe nulle evidentia archeologic que lo supporta.

Secundo un mesuramento, le infantes chinese de tres annos surride plus rarmente que lor contemporaneos american, nonobstante que le solide quietude e surriso del populos oriental es in general multo invidiate in le societates occidental plen de tension.

Del examines ha devenite clar que le familias chinese, le quales educa in le majoritate del casos solmente un infante, ha troppo de pretensiones requirite de lor infantes, e assi le infantes chinese deveni dependente, e multo plus reservate, que lor contemporaneos american.

Fonte: Metro - un jornal hungare gratis.

Opina iste articulo!

Microsoft prepara un nove version de su successose programma de chat MSN Messenger que permitte mantener un lista de contacto pro vider su amicos actualmente in-linea. On pote contactar personas per illo per scripto e per voce.

Le nove version de Microsoft va offerer iste functionalitates sin le necessitate de installar alcun programma in le computator personal; le navigator del web sufficera. Assi on rende plus facile le uso al personas que non pote connecter se ab lor empleos o scholas.

(Nota del redaction: le concurrente AOL offere jam desde longe tempore un version web de su programma de messageria.)

Opina iste articulo

Un nomine agradabile pote render alicuno plus sexy - assere le linguista Amy Perfors del Instituto de Technologia de Massachusetts.

Illa ha monstrate photos de feminas e homines al subjectos de un experimento. Le subjectos debeva appreciar le personas in le photos secundo quanto illes les trova sexualmente attractive. Postea le mesme photos esseva monstrate etiam con prenomines. Il se monstrava que le verdicto del “publico” depende multo del sorta del vocales apparente in le nomines. Le viros cuje nomines contine vocales formate avante in le bucca - como in le nomine “Matt” - esseva trovate plus sexy, que illes con nomines de vocales formate detra. Justo le inverso vale al feminas – assere le studio.

Fonte: Metro - un jornal gratis hungare

Le governamento de Corea ha resolvite a edificar un nove capital del stato, situate in le centro del pais. Iste projecto comenciara in 2007. Per isto on spera que Seul (le capital grandissime con plus de 10 milliones de habitantes) devenira minus congestionate.

Le nove capital essera construite a 160 kilometros de Seul, in le provincia de Chungcheong, un zona con bon accessos. On spera que le prime ministerios se movera al nove citate in 2012.